ANC-wyksraadslid afgedank oor 'korrupsie'
2012-02-12 16:59
Johannesburg – ‘n ANC-wyksraadslid wat daaraan skuldig bevind is dat hy eiendom van die raad verkoop het, is met onmiddellike effek uit sy posisie in Johannesburg geskors, het die party Sondag gesê.
“Hy het die party in die verleentheid gebring. Noudat hy dissiplinêre prosedures op raadsvlak ondergaan het en uit die raad verwyder is, sal hy na ‘n streeks-dissiplinêre raad moet gaan,” het Jolidee Matongo, woordvoerder, gesê.
Die besluit om Nkhasi, raadslid vir wyk 28, te verwyder, is gemaak deur die LUR vir plaaslike regering en behuising, Humphrey Memezi. Die besluit is deur die ANC in die Johannesburg-streek verwelkom, het Matango gesê.
“Die LUR het gesê ‘n kriminele klag moet ingedien word. Dit sal in die week gebeur,” het hy gesê.
Nkhasi het in 2008 grond in Diepkloof aan die Together As One Church of Christ verkoop vir R15 000.
Nadat die kerk die geldigheid van strokies en briewe wat die oordrag van grond bevestig bevraagteken het, het hulle ‘n anonieme oproep gekry wat die kerk waarsku om bouwerk te staak, of iemand sal doodgemaak word.
Nadat hy beloof het om die kwessie te ondersoek, het Nkhasi gesê die kerk kan nie meer die grond koop nie en hy het die R15 000 terugbetaal. Die kerk het egter toe reeds R11 000 aan boumateriaal spandeer.
Nkhasi sal nou voor die ANC se streeks-dissiplinêre komitee in Johannesburg verskyn van 15 tot 17 Februarie.
Volgens Matongo sal ‘n tussenverkiesing gehou moet word en die raad wag op instruksies van die Onafhanklike Verkiesingskommissie oor beskikbare datums.
Raadslede Neo Mashele en Paul Masemola sal intussen vir die wyk optree.
- Volg Nuus24 op Twitter