ANC wil name nog vóór fees verander
2011-12-21 10:03
Bloemfontein – HY wil graag sien dat die nuwe Vrystaatse plekname voor Januarie, betyds vir die ANC se eeufeesviering in Bloemfontein, goedgekeur word.
Só sê adv. Sephiri Moshodi, voorsitter van die Vrystaatse komitee vir geografiese name.
“Die voorgestelde name gaan aan die Suid-Afrikaanse Raad vir Geografiese Name gestuur word sodat dit binnekort goedgekeur kan word.” Hy hoop dit gebeur voor die ANC se eeufees in Januarie in die Rosestad.
Altesaam R2 miljoen is in die Vrystaat bestee aan openbare verhore oor pleknaamveranderings.
Die komitee is in Julie vanjaar deur die departement van sport, kuns en kultuur gestig om onder meer navorsing te doen oor naamsveranderinge en om inwoners van stede en dorpe daaroor te raadpleeg. Die komitee het verskeie openbare verhore oor die provinsie heen gehou.
Volgens Moshodi is ’n gedeelte van die R2 miljoen gebruik vir reiskoste en bemarking.
“Ek weet glad nie wat dit gaan kos om die name wel te verander nie. Die provinsiale regering sal dit moet beantwoord.”
Tankiso Zola, woordvoerder vir die provinsiale departement, sê hy kan nie kommentaar oor die koste lewer voordat hy nie al die feite tot sy beskikking het nie. Volksblad verneem dit kan tot R22 miljoen beloop.
Sommige van die nuwe voorgestelde name is skerp deur individue, maatskappye en inwoners veroordeel en daar is gesê dit is ’n onnodige verkwisting van geld.
’n Beswaarde groep op Kroonstad, Gatvol Kroonstad, het ’n versoekskrif begin om te keer dat die dorp se naam verander.
Moshodi het gesê hy weet daar is beswaar oor die dorp se naam, maar indien die Suid-Afrikaanse Raad vir Geografiese Name dit goedkeur, sal die proses begin om die naam te verander.
Sommige van die nuwe voorgestelde name is die name van helde uit die apartheidsjare.
Moeketsi Lebesa, leier van die Dikwankwetla-party, sê om die name na ANC-helde te verander, is om die geskiedenis te verdraai.
“Die ANC-helde is nie die enigstes wat geveg het vir demokrasie nie.” Voorts sê hy om die name te verander, is net ’n manier om geld te verkwis.
“Ons paaie word deur slaggate verteer en om ’n paar name te verander, gaan beslis nie honger mense kos gee nie.”
Volg Nuus24 op Twitter.
- Volksblad