ANC wil met Tutu vergader
2011-10-07 09:08
Johannesburg – Die regerende party beplan om met emeritus-aartsbiskop Desmond Tutu te vergader ná sy aanval op die ANC vroeër vandeesweek, berig Mail & Guardian.
Die ANC sal "die tyd en ruimte vind om met Tutu te vergader om die kwessies rondom die visum-debakel en sy kommentaar te bespreek," het Lindiwe Zulu, die president se raadgewer met betrekking tot internasionale betrekkinge, gesê.
Zulu het gesê die regering het "nie een keer gesê die visum gaan nie uitgereik word nie".
"Die regering het om vrae te opper indien daar probleme met die visumaansoek is, maar ek herhaal, ons het nooit gesê 'n visum sal nie aan die Dalai Lama toegestaan word nie."
Tutu het vroeër vandeesweek gesê hy sal bid vir die val van die ANC.
Dít kom nadat die Tibettaanse geestelike leier sy beplande besoek aan Suid-Afrika gekanselleer het omdat hy nie vroegtydig 'n antwoord gekry het oor sy visum nie.
Die Dalai Lama was uitgenooi om Tutu se 80ste verjaardag by te woon.
– Volg Nuus24 op Twitter
- SAPA