ANC wil inligtingswet stoomroller
2011-11-15 07:00
Kaapstad – Die verwagting is dat die ANC sy meerderheid gaan gebruik om die omstrede Wetsontwerp op die Beskerming van Inligting sonder ’n openbarebelang-verweer te aanvaar.
Die Nasionale Vergadering (NV) sal nou ook eers volgende week oor die omstrede wetsontwerp stem nadat die stemming aanvanklik môre sou wees.
Luwellyn Landers, ANC-LP, het Maandag bevestig die stemming is met ’n week vertraag om ’n “tegniese kwessie” op te klaar.
Die ANC het die wetsontwerp in September tydelik van die parlementêre program onttrek om sy eie konsultasieproses buite die parlement te volg.
Belangegroepe was onder die indruk dié konsultasieproses sou die weg baan om die ad hoc-komitee gemoeid met die wetsontwerp weer in die lewe te roep om die wetsontwerp te wysig.
Murray Hunter, nasionale koördineerder van die organisasie Right2Know, het Maandagaand gesê hulle is erg gefrustreerd.
“Daar was geen openlikheid rondom die sogenaamde konsultasieproses nie.
“Nou is die wet terug (op die parlementêre program) sonder dat enige veranderings aangebring is.”
Ook Dene Smuts, DA-LP, het Maandag aangevoer die ANC het van die begin af nie geweet wat hulle doen nie.
Van die grootste besware is dat die wet ongrondwetlik is in die afwesigheid van ’n openbarebelang-verweer om joernaliste wat geklassifiseerde staatsinligting openbaar maak, te beskerm.
Die Burger het verneem ook die vakverbond Cosatu volstaan by sy standpunt dat die wetsontwerp drasties herskryf moet word, veral omdat dit fluitjieblasers nie voldoende beskerm nie.
Alle aanduidings is egter daar dat die NV die wetsontwerp volgende week sal goedkeur en dat die Nasionale Raad van Provinsies (NRP) sekere wysigings sal voorstel wanneer die wetsontwerp voor hom dien.
Van die moontlike veranderings is om die gronde te verbreed ingevolge waarvan iemand ’n hof kan nader om toegang tot geklassifiseerde staatsinligting te kry.
Die wetsontwerp maak dit reeds moontlik vir iemand wat in besit is van geklassifiseerde staatsinligting om dit vóór publikasie aan ’n regter voor te lê, wat dan sal besluit of die bekendmaking wel in die openbare belang is.
Sou die NRP sekere wysigings voorstel, sal die wetsontwerp weer na die NV verwys word.
Na verneem word is die ANC nie meer van plan om die wetsontwerp vanjaar te finaliseer nie.
Die party is egter onverstoord as dit by die openbarebelang-verweer kom.
Die NV sal môre ’n uur lange debat oor die wetsontwerp voer.
Volg Nuus24 op Twitter
- Die Burger