ANC wil 'apartheid se nalatenskap uitwis'
2013-01-12 14:53
Durban – Die ANC het hom daartoe verbind om die nalatenskap van apartheid gedurende "die tweede fase van die oorgang" uit te wis, het pres. Jacob Zuma Saterdag gesê.
"Die 53ste nasionale kongres [in Mangaung] het gekyk na die impak van die nalatenskap van apartheid, wat voortgaan met armoede, werkloosheid en ongelykheid," het Zuma aan 'n paar duisend ANC-lede gesê tydens sy toespraak by die viering van die party se 101ste bestaansjaar by Kingspark in Durban.
"Soos ons in die tweede fase van die oorgang ingaan… verbind ons ons aan 'n program van aksie om die uitwissing van hierdie nalatenskap te bespoedig en om sosio-ekonomiese vryheid te bring."
Hy het gesê die ANC het "noemanswaardige vooruitgang" gemaak sedert die eerste demokratiese verkiesing in 1994.
"Ons land se Grondwet, wat een van die grootste prestasies van die vryheidsbewegings is, het sy wortels in die ANC se menseregtedokumente soos… die Vryheidsmanifes," het Zuma gesê.
"Ons doen 'n beroep op ANC-lede om die land se Grondwet te alle tye te vier, te bevorder en te verdedig."
– Volg Nuus24 op Twitter.
- SAPA
