ANC vra hulp met sy eeufees
2011-12-08 07:00
Bloemfontein – In die lig van die meer as 100 000 mense wat volgende maand na die ANC se eeufeesvieringe in Bloemfontein gaan stroom, word ’n sterk pleidooi aan boere en ander inwoners gerig om grond beskikbaar te stel vir tentdorpe waarin gaste kan bly.
Talle tentdorpe sal na verwagting nodig wees en op oop stukke grond in en om die stad opgerig word.
Só sê Thabo Manyoni, die Mangaung-metro-munisipaliteit se uitvoerende burgemeester en ondervoorsitter van die ANC in die Vrystaat, in ’n eksklusiewe onderhoud met Volksblad oor die gasheerrol wat hy vir die ANC-eeufees moet vervul.
Hy sê hoewel hy nie bekommerd is oor die aantal mense wat na die Rosestad gaan kom nie, is hy wel bekommerd oor of die stad in die water- en elektrisiteitsaanvraag sal kan voorsien. Taakspanne sal dié kwessies, asook of hier voldoende sanitasie is, ondersoek.
Manyoni het erken die stres begin sy tol eis, want presies ’n maand voor een van die grootste geleenthede wat Bloemfontein tot nog toe gaan aanbied, moet nog baie gebeur.
“Ons soek nog hope markies- en ander tente om te gebruik vir diegene wat onder die sterre moet slaap. Van die gaste sal met eie kampeertoerusting kom. Boere se goedgunstigheid word gevra om kampeergrond beskikbaar te stel.”
Op die vraag presies hoeveel mense die eeufees gaan bywoon, sê hy: “Moenie oor getalle bekommerd wees nie, maar dis of die water en elektrisiteit gaan hou.”
Volgens hom werk nasionale en provinsiale taakspanne van 100 mense nou saam met die Mangaung-metro.
Op die vraag of daar genoeg sanitasiegeriewe vir die gaste wat onder die sterrehemel gaan slaap, beskikbaar gaan wees, het hy gesê daar bestaan nog onsekerheid oor hoe dié probleem opgelos gaan word.
Dan soek hy ook nog ’n groot genoeg onthaallokaal vir die gala-geleentheid op 7 Januarie waarop die staatshoof, pres. Jacob Zuma, en die meer as 40 staatshoofde, gaste sal wees. Van die mense kom van onder meer Rusland, Skandinawië, Swede en Afrika-state.
Manyoni glo die eeufeesvierings sal naas die Wêreldbeker-sokkertoernooi die naasgrootste geleentheid in Bloemfontein se geskiedenis wees.
“Ek wens ek kan self in die lokasie gaan bly,” sê hy oor die groot geld wat die mense van Woodland Hills met die verhuring van huise gaan verdien. Hy glo die ANC se eeufees sal Bloemfontein internasionaal op die kaart plaas.
Dit sal ’n histories betekenisvolle geleentheid wees deurdat die plaaslike en internasionale gemeenskap met die stad en sy geskiedenis in verbinding gebring word.
Volg Nuus24 op Twitter
- Volksblad