ANC verwurg sieninge, sê jeugliga
2012-05-27 11:31
Johannesburg – Die ANC se jeugliga (ANCYL) het die regerende party daarvan beskuldig dat hy probeer om die siening van individue dood te wurg.
Khusela Sangoni, ‘n woordvoerder vir die jeugliga, het gereageer op 'n verklaring van die ANC oor die boikot teen City Press en die bedanking van Vusi Pikoli, voormalige hoof van die Nasionale Vervolgingsgesag (NVG), uit sy pos by 'n ouditeursmaatskappy.
Sangoni sê Pikoli se opmerking dat hy uit sy pos verwyder is weens politieke inmenging en die party se versoek om City Press te boikot dui op 'n toenemende onverdraagsaamheid teen weerstand binne die ANC, het RSG berig.
Die ANC het ‘n beroep op Suid-Afrikaners gedoen om City Press te boikot nadat die koerant geweier het om ‘n omstrede skildery van pres. Jacob Zuma van sy webwerf te verwyder.
Die regerende party sê egter hy is nie bewus van bewerings dat druk op Pikoli uitgeoefen is om uit sy pos te bedank nie, het die radiostasie berig.
Intussen het die Duitse kunsversamelaar wat die skildery van Zuma met sy geslagsdele ontbloot gekoop het, gesê hy gaan nie die beskadigde kunswerk restoureer nie, het Sapa berig.
Brett Murray se The Spear was by die Goodman-galery in Rosebank, Johannesburg, uitgestal toe dit vroeër vandeesweek deur twee mans beskadig is.
Die versamelaar het The Spear vroeg in Mei vir R136 000 gekoop.
Volg Nuus24 op Twitter
