ANC vertrap vryheid
2011-11-23 07:01
Kaapstad – Die ANC het Woensdag die muilbandwet met behulp van sy meerderheid deur die Nasionale Vergadering gestoomroller ondanks waarskuwings dat hy die land daarmee na ’n tydvak van geheimhouding terugneem.
In ’n stormagtige debat het Lindiwe Mazibuko, leier van die opposisie in die Parlement, die ANC gewaarsku dat hy die vryheid waarvoor Suid-Afrikaners geveg het, vertrap.
Mosiuoa Lekota, leier van Cope, het gesê hy sidder om te dink dat mense wat berig dat geld gesteel word, in die naam van die ANC opgesluit sal word.
Mondli Makhanya, voorsitter van die SA Nasionale Redakteursforum (Sanef), het ná die stemmery op die trappe voor die parlement gesê hy is gebroke.
“Ons het nooit kon dink die dag sou aanbreek dat ons, geklee in swart, hierheen sou kom en getuie sou wees van die feit dat ons demokrasie verraai word deur dieselfde mense wat daarvoor gestry het nie.”
Opposisiepartye het dit in die debat duidelik gemaak as pres. Jacob Zuma weier om die wet na die grondwethof te verwys, sal hulle hul getalle in die NV gebruik om dit self te doen.
Ingevolge die Grondwet kan ’n wet binne 30 dae nadat die president dit onderteken het, na die grondwethof verwys word indien ’n derde van die 400 parlementslede in die NV só ’n voorstel steun.
“En die goeie nuus is die opposisie het inderdáád ’n derde,” het Steve Swart, ACDP-LP, die ANC vooraf gewaarsku.
Die emosionele debat is gekenmerk deur intense verdeeldheid, skerp beskuldigings en vertragingstegnieke. Die opposisiepartye het die proses so lank moontlik probeer vertraag, maar sonder sukses.
Die ANC het die veldslag gewen deur die Wetsontwerp op die Beskerming van Staatsinligting met 229 stemme teenoor 107 aanvaar te kry. Dit word nou na die Nasionale Raad van Provinsies verwys, wat veranderinge kan voorstel.
Dit is egter te betwyfel of die openbarebelang-verweer in dié proses die paal gaan haal omdat die ANC duidelik onwrikbaar daaroor is.
“Ons bly onoortuig oor die (noodsaak van ’n) verweer van openbare belang... die meeste teenstanders van die wetsontwerp het dit nie eens gelees nie,” het Luwellyn Landers, ANC-LP, namens die regerende party gesê.
Die UDM-leier Bantu Holomisa, het adj.pres. Kgalema Motlanthe wat in die voorste banke gesit het, gevra om die wetsontwerp op die agenda te plaas wanneer die ANC se nasionale uitvoerende komitee die naweek vergader.
“Luister na die mense daar buite,” het Holomisa gemaan met verwysing na die toenemende burgerlike verset teen die wet.
Dr. Pieter Mulder, leier van die VF+, het aangevoer met die wetsontwerp loop Suid-Afrika die gevaar om dieselfde pad as Zimbabwe te loop waar geen persvryheid is nie.
Ook die Nelson Mandela-herinneringsentrum het sy stem tot dié van ander beswaardes gevoeg en in ’n verklaring gesê hulle is bekommerd sekere dele van die wet is “ongrondwetlik”. Maar volgens die stigting kan dit maklik reggestel word sonder om die basiese beginsels van die wet te “kompromitteer”.
’n Paar honderd ondersteuners van die Right2Know-veldtog, asook joernaliste en ander belangstellendes het tydens die stemmery buite die Parlement teen die wetgewing betoog.
Net nadat die wetsontwerp aanvaar is, het almal in die openbare galery en mediagalery die sitting uit protes verlaat.
– Volg Nuus24 op Twitter
- Die Burger