ANC gee toe, skuif Malema-verhoor
2011-09-06 12:31
Johannesburg – Die ANC se tugkomitee het ná verlede week se ontwrigting van sake-ondernemings in die Johannesburgse middestad besluit om die verhoor van sy jeugligaleiers na 'n ander lokaal te verskuif.
Dit is nie bekend waar die verhoor nou gehou gaan word nie.
Derek Hanekom, voorsitter van die tugkomitee, het Dinsdag in 'n verklaring gesê die nasionale tugkomitee (NTK) het verskeie faktore in ag geneem – insluitend regsaksie teen die ANC se besluit om die dissiplinêre verhoor by Luthuli-huis te hou.
'n Regsfirma het die ANC tot Dinsdag 16:00 gegee om aan te dui of hulle die verhoor uit die middestad gaan verskuif.
Die verhoor word Sondag hervat en sal na verwagting drie dae duur.
Malema word daarvan aangekla dat hulle die party in oneer bring oor hul openlike steun aan opposisiepartye in Botswana vir regeringsverandering in die land. Malema is ook daarvan aangekla dat hy verdeeldheid in ANC saai.
Malema en vier ander beamptes van die jeugliga het verlede week voor die NTK verskyn.
– Volg Nuus24 op Twitter
- Nuus24