ANC veroordeel gru-plaasmoord
2011-02-10 09:03
Kaapstad – Die ANC het Woensdag in wat as ’n “simboliese gebaar van uitreiking” na die boeregemeenskap beskou word, die grusame moord op ’n bejaarde boer van Limpopo skerp veroordeel.
André Botha, voorsitter van Agri SA se nasionale landelike veiligheidskomitee, het gesê dié ongewone stap “lei ’n nuwe era” in die verhouding tussen die regerende party en die land se boere in.
Frik Hermann (78) se lyk is Dinsdag in sy plaashuis naby Alma gevind. Sy hande was agter sy rug vasgebind en dit blyk hy was reeds ’n paar dae lank dood.
Hermann is die oom van dr. Dirk Hermann, uitvoerende adjunkhoof van die vakbond Solidariteit. Dr. Hermann het Woensdag gesê sy oom het vermoedelik nog geleef nadat sy aanvaller(s) gevlug het. “Hy was só vasgemaak dat hy nie kon loskom nie.”
Die ANC het ’n verklaring uitgereik waarin hy die “koelbloedige moord ten sterkste veroordeel” en het gesê dit is ysingwekkend dat plaasmoorde gepleeg word.
“Die land is beroof van ’n persoon wat die grootste gedeelte van sy lewe aan boerdery gewy het – ’n kritieke sektor vir ekonomiese groei en voedselsekerheid,” het Jackson Mthembu, nasionale woordvoerder, gesê.
Hermann het sy waardering teenoor die ANC vir die sterk bewoorde reaksie uitgespreek.
“Maar reaksie alleen is onvoldoende. ’n Mens hoop die sterk verklaring lei tot ’n nuwe fokus op plaasmoorde.
“Die ANC behoort só oor elke plaasmoord te voel. Mag oom Frik se moord die vonk wees vir ’n vuur teen plaasmoorde.”
Hermann het Woensdag ’n brief vir pres. Jacob Zuma geskryf waarin hy aanvoer sy oom is “boer nommer 1647” wat vermoor word.
“Ek doen ’n dringende beroep op u om wel in u staatsrede erkenning te gee aan die hartseer en pyn van families wat sonder hul geliefdes na u gaan luister,” lui sy brief.
Die verhouding tussen die regering en boere was die laaste paar jaar stram, onder meer weens die vorige minister van landbou, Lulu Xingwana, se omstrede uitsprake en die boeregemeenskap se gevoel dat te min gedoen word om landelike gebiede te beveilig.
Volgens Botha het georganiseerde landbou en die regering ’n beter verstandhouding ná hul gesprekke by die sakeberaad in Durban in Julie verlede jaar.
’n Gesindheidsverandering het plaasgevind en daar is ’n politieke wil om landelike veiligheid op te skerp, al ontbreek die kundigheid en doeltreffendheid soms op grondvlak om dit in werking te stel.
“Maar ons word as volwaardige landsburgers erken en dit gee ons hoop,” het Botha gesê.
Volgens hom is misdaad nie tot landelike gebiede beperk nie en distansieer Agri SA hom van groepe wat plaasmoorde verpolitiseer.
“Die meerderheid plaasmoorde is gewone misdaad – boere is sagte teikens en hulle is goedgelowig.”
- Volksblad