'ANC vermors mense se talent' – DA

2012-09-15 18:44

Johannesburg –  Die parlementêre leier van die DA, Lindiwe Mazibuko, het gesê gewone burgers is bekommerd oor die krisis in die onderwys, die swak ekonomie en die groeiende ongelykhede, het RSG Saterdag berig.

Sy het by die party se kongres in Bloemfontein gesê ANC leiers dink nie oor die land se toekoms nie, terwyl staatsgeld misbruik word, geleenthede vir handel en beleggings verlore gaan en mense-talent vermors word.

Mazibuko het Julius Malema gestriem omdat hy mynwerkers aanhits om te staak en soldate uitbuit vir politieke voordeel.

Die president van die Inkatha Vryheidsparty, Mangosuthu Buthelezi, het intussen ook die ANC gekap oor Malema se gedrag en sê hy is lank toegelaat om mense te beledig.

Hy het tydens 'n Erfenisgeleentheid op Ga-Mashashane in Limpopo gesê die ANC moet die verantwoordelikheid dra vir Malema se weerbarstige gedrag.

Buthelezi sê hy het die ANC reeds tydens oudpresident Thabo Mbeki se termyn gewaarsku oor die gewese Malema se ongedissiplineerde optrede.

Volg Nuus24 op Twitter.

– RSG