ANC tik Manuel oor die vingers
2011-03-08 18:00
Johannesburg – Die ANC het Trevor Manuel, nasionale beplanningsminister, Dinsdag oor die vingers getik omdat hy soos 'n vrye agent opgetree het toe hy 'n ope brief aan Jimmy Manyi, hoofregeringswoordvoerder, geskryf het.
"Die nasionale werkkomitee (NWK) het verder 'n beroep gedoen op alle ANC-lede om nie soos vrye agente op te tree wat as individue praat nie," het Gwede Mantashe, sekretaris-generaal van die ANC, gesê.
Op die vraag of hy na Manuel verwys, het Mantashe gesê: "Ons verwys na Trevor Manuel of enigeen wat 'n lid van die ANC is... (want) om soos 'n vrye agent op te tree, hoef jy nie eers 'n organisasie te hê nie. So dit is nie net oor comrade Trevor nie, dit is oor almal."
Manuel het verlede week 'n ope brief aan Manyi geskryf waarin hy hom 'n "rassis" noem. Dít volg ná Manyi se opmerking verlede jaar dat daar 'n "oorkonsentrasie" bruin mense in die Wes-Kaap woon.
Volg Nuus24 op Twitter