ANC stook vuur om Chuene te pos

2009-10-05 05:44

Lizel Steenkamp

Kaapstad. – Vuur word agter die skerms gestook om van Leonard Chuene, president van Atletiek Suid-Afrika (ASA), ontslae te raak.

So sê ’n hooggeplaaste regeringsamptenaar wat gister verklaar het gesprekke word gevoer om druk op ASA te plaas om Chuene af te dank.

“Bepaalde prosesse is begin om verligting te bring. Daar is baie dinge (wat agter die skerms) gedoen word.”

Die regering se ongelukkigheid strek verder as net Chuene. Daar is “groot ongemak” oor ras-uitsprake in die Caster Semenya-sage.

Kommer oor hoe atletiek bestuur word, het ook toegeneem nadat Nedbank verlede week sy borgskap opgeskort het, onder meer weens die negatiewe publisiteit wat ASA die laaste ruk kry.

“Dis ’n aanduiding van die erns van die situasie en hoe mense daar buite voel as ’n borgskap sonder konsultasie opgeskort word,” het die hooggeplaaste amptenaar aan Beeld gesê.

Chuene klou verbete aan sy pos sedert hy verlede maand beken het hy het gelieg oor geslagstoetse wat voor die Wêreldbyeenkoms in Berlyn op Semenya gedoen is.

Hoewel ASA op ’n spesiale vergadering op 24 September ’n mosie van vertroue in Chuene en sy bestuurspan aanvaar het, het die ANC en die departement van sport en ontspanning genoeg gehad.

Gert Oosthuizen, adjunkminister, het al voor dié vergadering ’n beroep op ASA gedoen om Chuene af te dank. En volgens Brian Sokutu, ANC-woordvoerder, het die regerende party se nasionale uitvoerende komitee ’n taakspan aangestel om die saak te ondersoek.

Sokutu het ontken dat die ANC eergister ’n groep mense na die Tuks-kampus in Pretoria vervoer het om ’n vergadering van besorgde atlete te ontwrig. “Die ANC het níks daarmee te doene gehad nie.”

Atlete wat Suid-Afrika sedert 1994 verteenwoordig het, het eergisteroggend vergader om ’n verslag op te stel wat hulle aan ASA, die regering en die internasionale vereniging van atletiek-federasies (IAAF) wou stuur.

Volgens Geraldine Pillay, ’n voormalige Olimpiese atleet, is die verslag toe nie opgestel nie omdat Hendrik Mokganyetsi, ’n raadslid van ASA, ’n groep ondersteuners gevat het om die vergadering te ontspoor. “Hendrik was aanvallend en aggressief. Hy het gesê dis ’n rassistiese vergadering wat ge- reël is om Chuene sleg te sê. Dít terwyl die meerderheid van ons swart is.”

Pillay het gesê diegene wat ongenooid opgedaag het, was nie atlete nie.

“Hulle het geskreeu en geskel en toe voor die deure gesing en getoi-toi. Ek het bedreig gevoel, maar die kampuspolisie het hulle later verjaag.”

Volgens haar is atlete moeg vir die “raskaart wat holrug gery is”. “Atletiek gaan oor atlete. Die geskreeu oor rassisme is nonsens. Ons probeer om atletiek se toekoms te red.”

Mokganyetsi het gister ontken dat hy ’n groep gevat het om die vergadering te ontwrig. “Kan hulle (die organiseerders) dit bewys?” Hy het die vergadering as oudatleet bygewoon, het hy verklaar en ook ontken dat hy die organiseerders van rassisme beskuldig het. “Nee, daar was nooit só iets nie.”

Volgens hom het Nedbank nie sy borgskap opgeskort weens die debakel om Semenya nie. “Dit het níks daarmee uit te waai nie. Nedbank behoort te weet ons hoofdoel is transformasie en ontwikkeling. Hoekom het hy onttrek voordat hy met ons (ASA) gepraat het?”


- Beeld