ANC-segsman dalk vry oor 'ongeldige' asemtoetser
2010-03-15 13:11
Johannesburg - Dronk bestuurders wat onlangs in Gauteng vasgetrek is, kan moontlik vrygespreek word nadat die asemtoetser waarmee hulle getoets is, opgeskort is, het die nasionale vervolgingsgesag (NVG) Maandag gesê.
"Die Dräger-apparaat is vir die afgelope twee weke weens ‘n sertifiseringsprobleem in Gauteng opgeskort,” het Mthunzi Mhagagesê.
"Ons het ook alle dronkbestuur-sake uitgegooi wat op die uitslae van dié asemtoetser sou staat maak. Dit is ook sake wat nog nie begin het nie."
Mhaga het gesê die NVG het met owerhede in ander provinsies in gesprek getree oor dié asemtoetser.
Indien dié asemtoetser, ná die besprekings wel opgeskort word, kan dit die einde van Jackson Mthembu, die ANC-woordvoerder se saak van dronkbestuur wees.
Mthembu is verlede week Donderdag in Kaapstad in hegtenis geneem nadat hy onder die invloed van drank bestuur het.
Hy is slegs met die Dräger-asemtoetser getoets.
Gauteng kan vir tyd en wyl slegs op bloedtoetse as bewys in dronkbestuur-hofsake staat maak, het hy gesê.
Sup. Wayne Minnaar van die Johannesburgse metro-polisie het gesê daar was niks met die apparate verkeerd nie.
"Alle masjiene moet aan die nasionale standaarde voldoen en ons hoop hulle kan so vinnig moontlik beskikbaar wees."
Die produksie bestuurder van Dräger, Chris Vertue het gesê ’n verandering in die vervolgingsriglyne het veroorsaak dat die masjien buite die veronderstelde sertifiseringsprosedures geval het. Daar was geen foute by die asemtoetser self nie, het The Star berig.
Vertue het gesê die onderneming wag vir die nodige papierwerk van Duitsland voordat hulle die apparaat kan hersertifiseer.
Die prosedure kan egter maande neem.
- Sapa