ANC salueer vliegramp-slagoffers
2010-07-24 15:47
Johannesburg - Die ANC het Saterdag die dapperheid en toewyding van die sewe polisielede wat Vrydag in 'n helikopterongeluk in Witbank dood is, salueer.
"Toe hulle vir nasionale diens geroep is, het hulle nie gehuiwer om op te staan in verdediging van die gemeenskap nie. Hulle het die belange van hul nasie voor dié van hul eie gestel," het Jackson Mthembu, woordvoerder, in 'n verklaring gesê.
"Hulle is inderdaad ons helde en hulle verdien om vereer te word vir hul toewyding en patriotisme."
Mthembu het die party se meegevoel teenoor die familie, vriende en kollegas van die oorledenes uitgespreek.
Hy het gesê hul pogings om misdaad te beveg, sal nooit vergeet word nie.
"Soos hulle in vrede rus, moet hulle weet dat baie van hul kollegas en die hele Suid-Afrikaanse bevolking aanhou veg in die stryd teen misdaad en korrupsie."
Die helikopter waarin die vyf polisiemanne, 'n polisievlieënier en 'n bemanningslid was, was van Pretoria na eMalahleni (Witbank) onderweg toe hul helikopter in Pine Ridge naby die Klarinet-plakkerskamp in eMalahleni ontplof en neergestort het.
Die polisiemanne wat in die ongeluk dood is, is die vlieënier kapt. Wikus Zaayman (31) en sy bemanningslid ao. Thinus Gouws (39), kol. Teboho Percy Maduna (39), ao. Colin Davids (37), ao. Dirk Cornelis van Aswegen (35), sers. Jacobus Henning (28) en sers. Daniel "Kraai" de Bruin (31).
Volg Nuus24 op Twitter
- SAPA