ANC ruk sy jeugliga toe nie in bek
2011-08-09 08:09
Johannesburg – Die langverwagte vergadering tussen die ANC se leierskorps en die halsstarrige ANC-jeugliga het Maandag op niks uitgeloop nie toe die vergadering uitgestel is.
Daar is wyd bespiegel dat die jeugliga in die bek geruk sou word nadat Julius Malema, jeugligaleier, uit sy beurt gepraat en gesê het hy beplan om ’n “bevelspan” saam te stel om weerstand teen pres. Ian Khama van Botswana te organiseer.
Die ANC het dié uitspraak as ’n verleentheid bestempel en gesê swak dissipline binne die jeugliga is hoog op die agenda van gister se vergadering in Luthuli-huis in Johannesburg.
Gwede Mantashe, sekretaris-generaal van die ANC, het egter Maandagmiddag laat in ’n verklaring gesê ná deeglike oorweging is die vergadering op die laaste oomblik uitgestel.
“Die rede waarom hierdie vergadering (tussen die ANC en die jeugliga) uitgestel is, is omdat die vergadering (van die ANC se nasionale uitvoerende komitee) besef het van die kwessies wat met die leierskorps van die ANC-jeugliga bespreek moet word, behels oortredings wat tot tugoptrede kan lei.”
Mantashe het verduidelik Maandag se vergadering sou die eerste tussen die ANC-leierskorps en die nuutverkose leiers van die ANC-jeugliga wees en sou die nuwe leiers se induksie insluit.
“Weens onlangse verwikkelinge en omstrede stellings deur die ANC-jeugliga is daar besluit dat dié kwessies tydens die vergadering aandag moet kry.
“Die vergadering het ooreengekom dat die nie-omstrede kwessies geskei moet word van dié wat as oortredings beskou word.”
Politieke ontleders meen dit is onwaarskynlik dat Zuma daadwerklik teen die jeugliga sal optree omdat die ANC-leierskorps bang is om die liga op sy plek te sit in die aanloop tot die volgende ANC-leierskonferensie in Mangaung.
Die Sunday Independent het Sondag berig die ANC-jeugliga finaliseer sy kandidatelys van ANC-leiers wat hy op die regerende party se 53ste nasionale konferensie in Desember volgende jaar gaan ondersteun.
Floyd Shivambu, woordvoerder van die jeugliga, het dié bewerings Maandag ontken. Hy het gesê die jeugliga se aksieplan vir ekonomiese bevryding sal uiteindelik die leidende faktor wees om te besluit wie hulle in die ANC-leierskapstryd ondersteun.
Volg Nuus24 op Twitter.
- Beeld