ANC ontken ontbinding van PUK in Limpopo
2012-02-06 18:56
Johannesburg – Die ANC het ontken dat enige gesprekke gevoer is oor die ontbinding van die party se provinsiale uitvoerende komitee (PUK) tydens die vergadering van die nasionale uitvoerende komitee (NUK) oor die naweek.
“Daar was geen gesprek om die PUK te ontbind nie. Die Limpopo-span het ‘n verslag oor die provinsie saamgestel en aanbeveel dat die PUK soos normaal moet voortgaan,” het Gwede Mantashe, sekretaris-generaal van die ANC, Maandag in Johannesburg aan verslaggewers gesê.
“Hulle ondersoek die dispute en sal die uitkomste saamstel sodra hulle klaar is,” het hy gesê.
The Times het Vrydag berig dat Cassel Mathale se leierskap van die ANC in Limpopo onder skoot gekom het by die NUK se vergadering.
Die NUK het luidens berigte bewerings ondersoek dat Mathale en sy bondgenote stemme gesteel het by die provinsiale konferensie in Desember.
Mathale word steeds beskou as die ANC se voorsitter in die provinsie. “Die ANC het geen saak teen Cassel Mathale nie,” het Mantashe gesê.
- Volg Nuus24 op Twitter
- SAPA