ANC ontken konkelskandaal
2012-12-05 12:48
Johannesburg – Die ANC ontken Nathi Mthethwa, minister van polisie, het benoemingsuitslae in die Noordwes ten gunste van pres. Jacob Zuma gedokter.
Die regerende party het bygevoeg die minister het nie polisiebeamptes opdrag gegee om ondersteuners wat teen die president gekant is, met rubberkoeëls te skiet nie.
Die party het in reaksie op ‘n berig in The Star gesê dit sou onmoontlik wees vir die minister – ook ‘n lid van die ANC se uitvoerende komitee – om dit te doen.
Jackson Mthembu, woordvoerder vir die ANC, sê “daar is geen manier” dat dit kon gebeur nie.
“Die enigste mense wat mag in die verkiesing het, is die verkiesingskommissie. Nathi [Mthethwa] het geen mag nie,” het die woordvoerder gesê.
The Star het berig die minister het die Noordwes se konferensie "gekaap" en adj.pres. Kgalema Motlanthe se ondersteuners met fop-afgevaardigdes vervang.
Die koerant het ook berig dat Mthethwa polisiebeamptes opdrag gegee het om afgevaardigdes wat Zuma nie ondersteun nie, met rubberkoeëls te skiet.
Noordwes-polisiebeamptes het bevestig dat skokstokke gebruik is om ‘n groep mense wat toegang tot die konferensie wou hê, uitmekaar te jaag. Polisiebeamptes kon egter nie bevestig of dié groep ondersteuners van die adjunk-president was nie.
Mthembu het bygevoeg dat afgevaardigdes by die konferensie deur die verkiesingskommissie geverifieer is.
Papiki Baboile, voorsitter van die ANC se jeugliga in die Noordwes, is ook oortuig dat iemand met die stemme gepeuter het.
Volg Nuus24 op Twitter
- SAPA
