ANC ontbind sy provinsiale bestuur: Brown lei steeds opposisie in Kaap
2009-07-20 07:37
Heindrich Wyngaard
Athlone – Me. Lynne Brown sal steeds die ANC as opposisie in die Wes-Kaapse parlement lei – al is sy en die res van die provinsiale ANC-bestuur (PUK) die naweek in die pad gesteek.
Dit is egter nie ’n uitgemaakte saak dat eerw. Chris Nissen as die nuwe tussentydse provinsiale leier aangestel sal word nie.
Onsekerheid heers ook oor of mnr. Mcebisi Skwatsha, die uitgeskopte provinsiale leier, ’n ambassadeurspos sal aanvaar as dit vir hom aangebied word.
Skwatsha was nie gister hier by die provinsiale algemene raadsvergadering nie omdat hy ’n begrafnis in die Oos-Kaap moes bywoon. Brown, wat ook steeds ’n lid van die ANC se nasionale uitvoerende komitee (NUK) is, het op dié vergadering gesê die PUK aanvaar die besluit Vrydag deur die NUK om te ontbind.
’n Tussentydse taakspan sal nou binne 14 dae aangestel word om die party in die provinsie te “herbou” totdat ’n nuwe leierskapkonferensie binne nege maande gehou word. Na verneem word, is die besluit deur al die ANC-streke verwerp – met die uitsondering van die Overberg, wat verdeeld was.
“Die mense wil môre ’n konferensie hê sodat hulle die leierskorps terug kan bring,” is gesê.
Die Gautengse premier, me. Nomvula Mokonyane, wat voor die April-verkiesing deur die NUK aangestel is om die Wes-Kaap se verkiesingsveldtog te lei, moes die NUK se besluit op gister se vergadering oordra.
Sy het agterna gesê die besluit om die Wes-Kaapse ANC te herbou is deur die hele vergadering én die PUK verwelkom. Oor Brown se posisie as opposisieleier in die provinsiale parlement het sy gesê: “Sy bly daar.” Maar die kantoor van mnr. Gwede Mantashe, ANC-sekretarisgeneraal, sal tot met die aanstelling van die tussentydse taakspan ook ’n ogie hou oor hoe ANC-LPP’s hul werk doen.
Intussen het die ANC die gewelddadige ontwrigting gister in Rustenburg van die byeenkoms van die Noordwes- provinsiale uitvoerende raad skerp veroordeel.
’n Fotograaf van die SAUK is in ’n skietery voor die Ben Marais-saal gewond te midde van dreigemente teen die lewe van LUR’e. ’n Polisie-ondersoek is gevra om vas te stel of die oproermakers wel ANC-lede met griewe was en nie net “misdadige elemente wat hulle as sodanig voorgedoen het nie”.