ANC ongelukkig oor reaksie op Zuma-woning
2011-10-20 22:15
Johannesburg – Die ANC het pogings van die media en die opposisie om die “instandhouding van openbare bates te kriminaliseer” gekritiseer en gesê dit is ‘n dominante praktyk in verskeie lande.
“Die mediaberigte probeer om die instandhouding van openbare belange te kritiseer, asof dit nie ‘n inherente verantwoordelikheid van openbare werke is nie,” het Jackson Mthembu, woordvoerder, in ‘n verklaring gesê.
“As openbare bates verwaarloos is, sou beide die media en die opposisie geraas gemaak het en wanneer die regering die waarde van sy bates in plek hou, word ‘n mens steeds van onreg beskuldig.”
Die koerant The Star het vroeër Donderdag berig dat die restourasie van die binnehuis van President Jacob Zuma se amptelike woning in Pretoria tot R170 miljoen sal beloop.
Dít het Woensdag aan die lig gekom in skriftelike antwoorde van die minister van openbare werke, Gwen Mahlangu-Nkabinde, op parlementêre vrae van die DA.
Die restourasie sluit ‘n sauna en ‘n stoomkamer in.
Die algehele waarde van die restourasie, bouwerk en ander werk wat reeds gedoen is aan Zuma se kantore, amptelike wonings in Kaapstad en Pretoria, asook projekte by die Bryntirion ministeriële landgoed, beloop meer as R400 miljoen.
Mahlangu-Nkabinde het egter die berigte van restourasie Donderdag verwerp. Haar beamptes het haar verseker dat, alhoewel dit waar is dat die presidensiële woning opknappingswerk benodig, hulle nog nie enige kontrakte gefinaliseer of besluit het op ‘n datum waarop die bouwerk sal begin nie.
“Geen werk is nog onderneem nie en geen geld van belastingbetalers is nog spandeer nie.
“In Maart vanjaar, toe ek gehoor het van die koste van die opknappingswerk, het ek gesê dit is te hoog en gesê dit kan nie voortgaan nie,” het sy gesê.
Mthembu het ongelukkigheid uitgespreek oor die manier waarin die media gereageer het.
“Dit is nie in die belang van Suid-Afrika vir die President om onregverdige kritiek te ontvang wanneer die regering praktyke onderskryf wat oor die wêreld heen dominant is nie,” het hy gesê.
Hy het die opposisie se verantwoordelikheid om die regering verantwoordbaar te hou erken, maar het gesê die opposisie het ook ‘n verantwoordelikheid om die rol van die regering en die President te respekteer.
“Dit sal ‘n hartseer ding wees as die media en die opposisie wil voorgee of die veiligheid van ‘n President en sy welstand nie van belang is vir die land nie.”
- Volg Nuus24 op Twitter
- SAPA