ANC-ondersoek is om ‘Titanic met kougom aanmekaar te probeer hou’
2011-12-18 08:05
Johannesburg – Die ANC is keelvol vir joernaliste wat verwys na “anonieme bronne” in sy nasionale uitvoerende komitee (NUK) en sal voortaan fyn dophou met watter media dié klikbekke praat.
Die meerderheidsparty reken dié gedrag is ’n aanklag teen sy lede.
Dit spreek van swak dissipline en moet in die kiem gesmoor word, veral in aanloop tot die ANC-leiersverkiesing volgende jaar in Mangaung.
Ishmael Mnisi, ’n ANC-woordvoerder, het gesê daar word deesdae beter gemonitor hoe joernaliste oor die ANC berig. ’n Private maatskappy laat Luthuli-huis weet waar presies mediahuise (koerante, TV én radio) hulle op ’n skaal bevind van positiewe, neutrale en negatiewe dekking.
Ook Afrikaanse media word gemoniteer, is aan Rapport bevestig.
Dit kom nadat Gwede Mantashe, sekretaris-generaal, ná ’n NUK-vergadering gesê het leiers wat die ANC in die media kritiseer, is soos ’n slang wat homself byt in ’n poging om sy eie wonde te genees.
Mnisi sê die dophou van beriggewing is nie soseer daarop gemik om individuele joernaliste se werk te ontleed nie, maar eerder om vas te stel met watter joernaliste die klikbekke graag praat.
Die monitering kyk dus spesifiek na gevalle waar anonieme bronne vanuit ANC-leiersgeledere in beriggewing opduik en dié bronne basies uit die slaapkamer praat.
Waar sogenaamde binnekring-bronne gebruik word, sal die tersaaklike mediahuis gekontak word om feite in die berig te bespreek.
Die spesifieke joernalis sal by die feitesending betrek word, sê Mnisi.
Rapport het intussen van ’n verslaggewer verneem dat Mantashe hom gebel het oor ’n rubriek wat hy geskryf het om hom oor sy bronne uit te vra en te kla omdat die ANC in ’n swak lig gestel word.
Mnisi sê dit is onaanvaarbaar dat hul lede as “bronne” of in ’n “nie-amptelike hoedanigheid” met die media praat terwyl daar amptelike kanale is om inligting te bekom.
Prof. Anton Harber van die Universiteit van die Witwatersrand het by navraag gesê hy is onseker wat dié poging die ANC in die sak sal bring.
“Solank daar verdeeldheid in ’n regerende party is, sal inligting uitlek en sal mense met die media praat.
“Dit sal hulle baat om die werklikheid te aanvaar. Dit is ’n gesonde aspek van oop debatvoering en die uitruil van inligting in ’n vrye samelewing.
“Om in die era van WikiLeaks te glo jy kan die uitlek van inligting keer of beheer, is soos om te glo jy kan die Titanic met kougom aanmekaar hou,” sê Harber.
- Rapport