ANC 'onbewus' van pos vir Niehaus

2012-05-02 23:00

Johannesburg – Die ANC het Woensdag gesê hy is nie bewus dat sy voormalige woordvoerder, Carl Niehaus, moontlik weer ‘n pos in die party gaan beklee nie.

“Ons is nie bewus daarvan nie,” het die ANC se woordvoerder, Keith Khoza, gesê.

Niehaus het Woensdag in ‘n onderhoud met Talk Radio 702 gesê daar sal in die nabye toekoms ‘n pos vir hom in die ANC wees.

“Daar sal binnekort ‘n formele posisie wees, maar laat die ANC daaroor praat, nie ek nie,” het hy gesê.

“Dit is baie belangrik om die ANC oor ANC-posisies te laat praat. Al wat ek aan julle kan sê, is dat my betrokkenheid in die ANC elke dag toeneem.”

Niehaus wou nie verdere besonderhede oor die vooruitsig gee nie.

In 2009 het Niehaus erken dat hy Gautengse senior provinsiale regeringslede se handtekeninge nagemaak het om ‘n lening te bekom.

Dit het gevolg ná bewerings aan die lig gekom het dat hy glo betrokke was in bedrog en leuens om ‘n duur leefstyl te handhaaf wat hom in skuld gedompel het.

Dit het ingesluit leuens oor ‘n doktersgraad, ‘n vervalste brief sodat hy ‘n lening kon ontvang en berigte van miljoene rande se skuld, standaardbetalings en beskuldigings teen sy naam.

In daardie tyd het die ANC oorspronklik gesê hy sal weer in die party aangestel word, maar het later gesê Niehaus het inligting van hom weerhou en het besluit om hom op verlof tot afwesigheid te plaas.

Niehaus het Woensdag aan Talk Radio 702 gesê hy het al sy skuld vereffen en vrede gemaak met die aantygings van bedrog. Hy is nou vasbeslote dat ‘n amptelike posisie in die ANC in die nabye toekoms is, het Cape Argus berig.

Hy kon nie onmiddellik vir kommentaar bereik word nie.

– Volg Nuus24 op Twitter
 

- SAPA