ANC moet luister, maan Motlanthe
2012-12-03 17:27
Johannesburg – As die ANC nie na die mense van Suid-Afrika luister nie, verdien die party nie sy magsposisie nie, het adj.pres. Kgalema Motlanthe Maandag tydens ‘n onderhoud gesê.
“Ons moet streef om relevant te wees tot gewone Suid-Afrikaners,” het hy in ‘n onderhoud met die BBC gesê.
“As gewone Suid-Afrikaners nie in die ANC 'n natuurlike politieke tuiste sien, of ‘n instrument sien wat hul eie behoeftes vervul nie, gaan hulle na ander partye beweeg.”
“Hulle [kritici] het die reg om die ANC te oordeel op grond van wat dit is, nie wat dit was nie,” het hy gesê.
“As ons nie ons beste kan gee nie... verdien ons nie hierdie posisies van verantwoordelikheid nie.”
Hy het ook gesê die regerende party moet verantwoordelikheid neem vir foute.
“Ek neem verantwoordelikheid vir ons foute en ek glo wanneer ons iets reg doen moet dit nie skielik gevier word nie.”
Motlanthe het egter nie tydens die onderhoud gesê of hy sy benoeming as president van die ANC aanvaar het nie.
“Ek weet nog nie eens dat ek benoem is nie, behalwe vir dit wat ek in die koerante lees.”
Hy het ook gesê dat hy nie bewus is dat Julius Malema, voormalige leier van die ANC-jeugliga, hom as president van die ANC ondersteun nie.
– Volg Nuus24 op Twitter
- SAPA
