'ANC moet homself vernuwe'
2012-01-28 08:30
Pretoria. – Die ANC moet besef dit help nie veel om homself te verheerlik op grond van sy ryk geskiedenis as hy nie die nodige lesse kan toepas om op hedendaagse uitdagings te reageer nie.
Só het adj.pres. Kgalema Motlanthe Vrydag by Unisa gesê in ’n lesing waarin hy onder meer die ANC se honderdjarige bestaan in heroënskou geneem het.
Volgens Motlanthe moet die ANC op uitdagings reageer en homself nie beskou as ’n organisasie wat ’n monopolie op wysheid in die samelewing het nie. Hy moet liewer sy strategiese doelwitte probeer bereik deur alle maatskaplike magte uit alle stande van die samelewing te betrek.
Volgens Motlanthe moet die ANC besef die verwerwing van vryheid deur sy leierskorps was nie net sy oorwinning nie, maar ’n “kollektiewe” oorwinning vir alle progressiewe magte – nasionaal en internasionaal – wat geen moeite ontsien het om die apartheidstelsel te verslaan nie.
Hy het gesê die afgelope 100 jaar simboliseer vir die ANC ’n oorwinning oor verdrukking en apartheid, maar ’n lang pad lê voor om ’n vooruitstrewende en regverdige samelewing te bewerkstellig. Dit word bevestig deur voortdurende rasse- en klasseverdelings, waar net enkeles toegang het tot wêreldklas-infrastruktuur, onderwys, gesondheid en sosio-ekonomiese geleenthede.
Motlanthe meen “ons nasie se lelike sy” word weerspieël in die hoë werkloosheidskoers.
“Die sukses van die ANC oor die volgende 100 jaar sal beoordeel word aan ons vermoë om ’n nuwe geslag Suid-Afrikaners te lewer wat gelyke toegang tot geleenthede het om ’n vooruitstrewende nasie te bou.”
Motlanthe het gesê geen organisasie is ewige lewe gewaarborg bloot op grond van sy historiese prestasies of omdat hy vryheid nagestreef het nie.
“Die ANC moet homself vernuwe deur sy tradisies en kernwaardes te beklemtoon en te voorkom dat sy wese weggekalwe word deur die sondes van amptenare wat post-koloniale bevrydingsbewegings elders geteister het.”
Motlanthe het ook gewaarsku teen materiële hebsug wat sommiges in die ANC aangegryp het.
– Volg Nuus24 op Twitter
- Beeld