ANC-man 'kaap' begrafnis
2011-03-21 10:59
Ermelo - 'n ANC-raadslid in Mpumalanga het 'n man se begrafnis gekaap om 'n woordjie vir sy party in te kry, het The Star Maandag berig.
Nadat hy frases soos "Viva ANC" en "Amandla" uitgeroep het by die begrafnis van Mandla Nkosi, 37, in Fernie, naby Ermelo, het plaaslike raadslid Jabu Hlophe by roubeklaers gepleit om te stem.
"Ons is besig met verkiesingswerk. Laat ons kameraad Mandla vereer deur te stem," het hy volgens die berig gesê.
"Ek glo ons almal weet ons moet op 18 Mei gaan stem," het hy voortgegaan, terwyl Nkosi se familie onderling gemompel het en die weduwee, Khonkezile Dumakude, 32, haar kop geskud het.
Nkosi en sy sewejarige drieling, Sindi, Sindiswa en Sindisile, is verlede week in Bertrams, Johannesburg dood toe hulle kamers afgebrand het ná wat moontlik 'n gasontploffing was.
'n Vriend van die familie, Sipho Mkhwanazi, het opgestaan en protes aangeteken.
"Nkosi het hierdie plek in 1990 verlaat. Maar noudat hy dood is, onthou die ANC hom. Hulle probeer selfs stemme werf tydens sy begrafnis. Dis baie verkeerd," het Mkhwanazi volgens The Star gesê.
Jackson Mthembu, ANC-woordvoerder, het gesê hy is nie vertroud met die besonderhede oor dié spesifieke voorval nie. Hy het egter gesê dat dit onaanvaarbaar sou wees vir 'n ANC-lid om tydens 'n begrafnis stemme te werf.
- Volg Nuus24 op Twitter.
- SAPA