ANC maan Madonsela oor 'inmengery'
2011-12-09 08:00
Kaapstad – Die openbare beskermer (OB), adv. Thuli Madonsela, moet haar plek ken.
Die ANC het Donderdag dié kwalik bedekte vermaning aan Madonsela in ’n verklaring uitgespreek.
Die party het gesê as mediaberigte oor haar uitsprake oor die Wetsontwerp oor die Beskerming van Staatsinligting waar is, meng sy haar in by die werk van die parlement.
Dit is “bisar” dat sy aan die speaker van die Nasionale Vergadering, Max Sisulu, geskryf het om kommer uit te spreek oor die wetgewende prosesse van die parlement, lui die verklaring.
Dr. Mathole Motshekga, ANC-hoofsweep, het Madonsela in die verklaring geprys vir haar “uitstekende” werk en die vreeslose en professionele manier waarop sy dit aanpak.
Hy is egter bekommerd oor die onlangse briefwisseling tussen Madonsela en Sisulu oor die afwesigheid van ’n openbarebelang-verweer in die finale weergawe van die Wetsontwerp oor die Beskerming van Staatsinligting.
Die wetsontwerp is twee weke gelede deur die Nasionale Vergadering aanvaar.
Volgens Motshekga is die kantoor van die OB onlangs in die media aangehaal waarin “kommer” uitgespreek word oor die wetsontwerp en dat die afwesigheid van die klousule “ondersoek” sal word as ’n klag ontvang word.
“As die mediaberigte reg is, blyk dit dat die openbare beskermer haar inmeng by die wetgewende proses deur die parlement se wetgewende besluite te bevraagteken en te dreig om dit te ondersoek.
“Dié optrede impliseer dat die parlement aanspreeklik is aan die openbare beskermer, terwyl die teenoorgestelde ingevolge die Grondwet waar is.”
Motshekga het daarop gewys dat álle staatsinstellings aan die parlement verantwoordbaar is.
Die Grondwet bepaal ook dat die parlement sy eie reëls en prosedures kan skep.
“Dit is om dié rede dat niemand die reg het om by die werk van die parlement in te meng tensy dit in ooreenstemming met die Grondwet en die reëls van die parlement gedoen word nie.”
As ’n artikel-9 instelling het die OB die reg om voorleggings oor konsep-wetgewing aan die parlement te doen.
“Wat ’n artikel-9 instelling egter nie kan doen nie, is om die parlement se wetgewende besluite te bevraagteken of hom in te meng by die wetskrywende prosesse,” lui die verklaring.
Kgalelelo Masibi, Madonsela se woordvoerder, kon Donderdag ná herhaaldelike probeerslae nie vir kommentaar bereik word nie.
Volg Nuus24 op Twitter
- Volksblad