ANC lieg toe openlik, sê TLU SA
2011-08-05 08:09
Kaapstad – Die ANC het blatant gelieg oor sy versekering dat nasionalisering nie oorweeg word nie, het Ben Marais, president van die landbou-organisasie TLU SA, gesê.
Marais het Donderdagaand gesê die onthulling van Cosatu dat hy die ANC-jeugliga aangemoedig het om nasionalisering op die tafel te plaas en dat die ANC reeds ’n taakspan aangestel het om na die uitvoering daarvan te kyk, is skokkend.
Hy het in ’n verklaring gesê dit is duidelik die jeugliga se eise is “nie net praatjies van ’n klomp jong heethoofde nie” en dat dit in werklikheid ondersteun word deur die ANC en Cosatu ... waarskynlik op grond van die SAKP se kommunistiese agenda”.
“Die ANC het dus blatant gelieg. Cosatu het nou openlik erken dat die ANC-taakspan reeds aanvaar het dat nasionalisering sal gebeur, maar dat daar nog besin moet word oor hoe dit prakties uitgevoer moet word.”
Marais het gesê die feit dat vergoeding vir alle nasionalisering ter sprake is, behalwe op grond, bevestig TLU SA se standpunt dat kommersiële boere geteiken word “om vernietig en uitgeroei te word”.
Hy het ook gevra of “dit dan die rede is waarom daar nie aandag aan plaasmoorde gegee word nie”.
Marais het gesê al is daar geen enkele suksesverhaal van nasionalisering ter wêreld nie, “loop die ANC en sy trawante reguit op die ekonomiese afgrond af”.
Die tyd het nou gekom dat die georganiseerde landbou en ondernemings in Suid-Afrika dringend byeenkom en hande vat om almal se belange te beskerm “teen die ernstigste bedreiging nóg wat die ekonomie en die land nou te wagte is”.
Marais het ook gewaarsku voedselsekerheid word ernstig bedreig. “In Egipte en Malawi het revolusies ontstaan deur hoë voedselpryse as gevolg van te min voedsel.
“As hier soortgelyke revolusies uitbreek, het die regering niemand behalwe homself daarvoor te blameer nie.”
Volg Nuus24 op Twitter.
- Beeld