ANC-leiers kry elk R100 000 borgtog
2011-08-01 12:16
Pietermaritzburg – Mike Mabuyakhulu, KwaZulu-Natalse LUR vir ekonomiese ontwikkeling, en die speaker in die wetgewer, Peggy Nkonyeni, is Maandag elkeen borgtog van R100 000 in die Pietermaritzburgse landdroshof toegestaan.
Hul medebeskuldigde, Ronald Green-Thompson, is op borgtog van R40 000 vrygelaat. Hy is die voormalige hoof van die KwaZulu-Natalse departement van gesondheid.
Die beskuldigdes sal weer op 20 Januarie 2012 in die hof verskyn.
Hulle word deur aanklagte van bedrog en korrupsie in die gesig gestaar.
Die aanklagte hou verband met ‘n “skenking” van R1 miljoen deur die Suid-Amerikaanse sakeman Gaston Savoi aan die ANC in 2007, in ruil vir ‘n tender van R45 miljoen van die regering.
Normale tenderprosesse is na bewering oor die hoof gesien sodat die tender aan Savoi se Intaka-maatskappy toegeken kon word om watersuiwerings-aanlegte aan hospitale en klinieke in KwaZulu-Natal te voorsien.
Volg Nuus24 op Twitter.
- SAPA