ANC-leiers het hul 'siele verkoop' – Chikane
2012-07-18 09:45
Johannesburg – Talle ANC-leiers van vandag het hul “siele verkoop”, het die struggle-veteraan Frank Chikane op die vooraand van Nelson Mandela se verjaardag gesê, het The Star Woensdag berig.
“Jy kan nie die mense lei as jy korrup is nie, want al hoe minder mense baat,” het Chikane gesê.
“Die enigste manier om ‘n leier van die gemeenskap te bly, is om gewone mense te laat voordeel trek uit die koek, nie die leiers nie, alhoewel daar na hulle omgesien moet word.
“As jy in mag wil bly, dien die mense. As jy nie die mense dien nie sal hulle teen jou draai,” het die voormalige direkteur-generaal in die presidensie gesê.
Chikane het ‘n staande toejuiging gekry nadat hy by ‘n seminaar in Qunu in die Oos-Kaap ter ere van Nelson Mandela gepraat het, het die koerant berig.
Hy sê vandag se ANC-lede moet na die veterane van die party soos Mandela, Oliver Tambo en Walter Sisulu kyk as voorbeelde van goeie leierskap.
“Maar vandag praat ek nie net van jong kaders nie, maar ou kaders ook. Die kaders smag na mag, vir beheer oor tenders.”
– Volg Nuus24 op Twitter
- SAPA
