ANC-leiers dalk 10 jaar in beheer

2012-12-09 11:51

Kaapstad – Die ANC in die Wes-Kaap sal vra dat die party se grondwet aangepas word om sy nuwe leiers 'n ononderbroke termyn van 10 jaar te gun, het berigte Sondag gelui.

Marius Fransman, provinsiale voorsitter van die ANC, het aan die Sunday Times gesê só 'n besluit sal die ANC stabiliseer en sal die stryd om die party se leierskap elke vyf jaar verhoed.

Die voorstel sal by die party se 53ste verkiesingskongres volgende week in Mangaung ter tafel gelê word.

"Party van ons sal deel wees van 'n baie sterk groep wat stabiliteit eis. 'n Deel van daardie stabiliteit kom daaruit as ons ons verkiesings binne die ANC beter bestuur, en om dit te doen moet ons 'n 10-jaar-pad vir leierskap hê," het Fransman gesê.

Hy het gesê die voorstel kan help om faksievorming te voorkom, en sal help om die proses uit te skakel waar kandidate geteiken word op grond van hulle menings voor 'n verkiesing.

Die voorstel sal nie van toepassing op die lede van die party se nasionale uitvoerende gesag wees nie, wat steeds elke vyf jaar gekies sal word.

– Volg Nuus24 op Twitter.

- SAPA