'ANC-lede moet verantwoordelik wees'

2013-01-12 07:29

Durban – Die ANC het verantwoordelike lede nodig wat aanspreeklik gehou kan word vir hul dade, het pres. Jacob Zuma Vrydag in Durban gesê.

"Verwyder dié siening wat geskep is dat amper elke kader van die ANC korrup is. 'n Kader moet vertroue inpalm," het Zuma by 'n fondsinsamelingsdinee gesê.

Zuma het geen leidrade gegee oor wat hy in sy toespraak Saterdag aan ANC-lede by Kingspark sal sê nie. Die party se 101ste bestaansjaar sal by dié geleentheid gevier word.

Zuma het na suksesse van die ANC verwys en gesê daar is min partye in die wêreld wat al meer as 'n eeu bestaan.

Hy het ook verwys na die ANC se verkiesingskongres in Mangaung, en gesê soortgelyke byeenkomste deur ander partye in die wêreld kry nie naastenby soveel aandag nie.

"Ek dink dit sê baie oor die politieke landskap in hierdie land."

– Volg Nuus24 op Twitter.

- SAPA