ANC kritiseer Jansen oor Reitz-vier
2009-10-17 23:44
Johannesburg- Die ANC het die rektor van die Universiteit van die Vrystaat (UV) se besluit om die Reitz-vier terug te verwelkom, fel gekritiseer.
Dié aankondiging is gisteraand in ’n “gebaar van rasseversoening en genesing” deur prof. Jonathan Jansen gedoen met sy inhuldiging as die UV se dertiende rektor.
Voorts word die eertydse Reitz-kamerwonings as ’n “model van rasseversoening en sosiale geregtigheid vir alle studente” heropen.
Die ANC het dié besluit verwerp.
"Die ANC is van mening dat dié gebaar nie tot versoening sal lei nie, maar sal rassehoudings nie net in die universiteit verhard nie, maar ook in die land."
Jansen is die eerste swart rektor en vise-kanselier van dié universiteit in Bloemfontein.
Oor die Reitz-voorval het Jansen gesê dis ’n fout om dit ingevolge ’n individuele patologie te verduidelik en te eenvoudig om die video as ’n produk van vier vrot appels af te maak.
Die video-opname is voorafgegaan deur ’n reeks rassevoorvalle uit protes teen rasse-integrasie, veral in koshuise. Nie alles het die pers gehaal nie en as dit nie vir die openbare verspreiding van die video was nie, sou niemand buite die UV daarvan geweet het nie.
Die ontstellende vraag is wat dit binne die UV was wat dié gruweldaad moontlik gemaak het.
Die Reitz-vier is vergewe en kan weer aan die UV kom studeer.
Ter erkenning van “institusionele medepligtigheid” en vir vergifnis gaan die UV ook skadevergoeding aan die werkers in die berugte Reitz-“walgvideo” betaal.
Ten spyte van die universiteit se besluit, sal die vier studente se verhoor op 26 Oktober begin.
"Die klaers in die saak is die slagoffers, nie die universiteit nie. Die universiteit se besluit sal egter nie die kriminele saak teen die beskuldigdes affekteer nie," het Muthunzi Mhaga, woordvoerder van die nasionale vervolgingsgesag, Saterdag aan die nuusagentskap AFP gesê.
– Sapa-AFP