ANC kap redakteurs
2010-08-09 07:45
Beeld
Kaapstad. – Die ANC en SAKP het ’n gesamentlike verklaring deur 36 koerantredakteurs teen planne om die media se beweegruimte in te kort – wat gister in Sondagkoerante verskyn het – as “teenproduktief” en “oneerlik” afgemaak en só die tafel gedek vir ’n vergadering met koerantredakteurs môre.
Dít te midde van koerantbase se mobilisering en planne om ’n breë front bestaande uit joernaliste, vakbonde, nie-regeringsorganisasies en die burgerlike samelewing te bewerkstellig om persvryheid te beskerm.
Jeremy Cronin, die SAKP se adjunkhoofsekretaris, het gesê die openbare verklaring deur redakteurs, waarin hulle ’n pleidooi lewer dat die ANC hom moet hou by die stigtingsbeginsels van ’n demokratiese Suid-Afrika, gaan die teenoorgestelde uitwerking hê.
“Dis teenproduktief, veral terwyl hulle ons nou probeer oortuig dat hulle in der waarheid nié anti-ANC of anti-regering is nie. Dis nié die boodskap wat oorkom nie.”
Ook die ANC, by monde van sy hoofwoordvoerder, Jackson Mthembu, was nie beïndruk deur dié vorm van solidariteit nie.
“Ons sal Dinsdag vir hulle sê hoe ons voel. Ek kan egter dít sê: die redakteurs is nie eerlik nie.”
Dit bly onduidelik wat Cosatu, die derde alliansievennoot, se amptelike standpunt rondom die breër kwessie van persvryheid is.
Hoewel die vakverbond sterk standpunt teen die voorgestelde Wet op die Beskerming van Inligting ingeneem het, het hy hom nog nie teen die beoogde mediatribunaal of die inhegtenisneming van ’n Sunday Times-joernalis verlede week uitgespreek nie.
Die Auckland Park-verklaring, wat Vrydag deur die land se vernaamste redakteurs onderteken is, verbind koerante daartoe om basiese regte soos in die Grondwet vervat “ten alle koste” en saam met alle Suid-Afrikaners wat hul vryheid hoog op prys stel, te verdedig.
Redakteurs sê hulle is diep bekommerd oor pogings om vryheid van spraak en die vrye vloei van inligting in te perk, veral omdat dit die “siel van demokrasie en die kern van die vryheidstryd” was en verwerp die voorgenome inligtingswet en mediatribunaal.
Mondli Makhanya, hoofredakteur van die Avusa-groep, sê die aksiekomitee wat verlede week gestig is om persvryheid te verdedig sal sy strategie om breë burgerlike mobilisering teen die ANC se planne te bewerkstellig vandeesweek afhandel.
“Dis ons besliste plan om groepe so breed moontlik te betrek.
Ons gaan met vakbonde, nie-regeringsorganisasies, burgerlike organisasies, kerke, die Freedom of Expression Institute (FXI), Treatment Action Campaign (TAC) en Save Our SABC Coalition (SOS) kontak maak.
Die punt wat gemaak moet word, is dit gaan nie net oor die media nie, dit gaan oor die vryheid van ons hele samelewing.
“Die Auckland Park-verklaring is histories ... dis redakteurs van oor die hele koerantspektrum wat aan die ANC sê: ‘Ons staan saam.’ ”
Volg Nuus24 op Twitter
- Beeld