ANC kan by ons leer, sê Vavi

2012-11-23 13:15

Johannesburg – Die ANC kan by Cosatu leer hoe om ‘n suksesvolle nasionale kongres te bestuur, het die vakverbond gesê.

“Die ANC kan by Cosatu leer. In die aanloop tot ons kongres... was die media oorspoel met ongegronde voorspellings van gevegte en verdeeldheid en selfs bloed op die vloer,” het Zwelinzima Vavi, sekretaris-generaal van die vakverbond, by ‘n Daily Maverick-konferensie gesê.

“Op die ou end het die werkers se parlement meer verenig as ooit te vore uitgekom...”

Vavi het bygevoeg dat kwessies soos armoede, ongelykheid, onderwys en gesondheid steeds nie reggestel is sedert die land in 1994 demokraties geword het.

“Ek wens elke liedjie, elke gedig, elke bespreking in elke politieke party... het oor hierdie tragedie gegaan...”

Hy sê die meeste ANC-lede is te behep daarmee om oor die party se leierskap te sing.

Vavi het ‘n beroep op die afgevaardigdes en regering gedoen om eerder te luister na wat die “myn- en plaaswerkers op straat te sê het.”

Hy het bygevoeg die ANC moenie meer die Absolutely No Consequences-party genoem word nie, maar daarop fokus om weer die African National Congress te word.

Volg Nuus24 op Twitter