ANC-jeugliga wil Zoeloe-groep muilband
2011-11-07 23:05
Durban – Izingane Zoma, sê dis ‘n jammerte dat die
ANC-jeugliga nie wil hê hulle moet ‘n liedjie sing wat dié maskandi-groep oor Julius Malema geskryf het
nie.
“Die dames voel seergemaak,” het hul
vervaardiger, Shobeni Khuzwayo, gesê.
“Hulle voel hulle word as vroue onderdruk en
dat hulle nie die reg gegun word om hulself vryelik in ‘n demokratiese land uit
te leef nie.”
Izingane Zoma het klaarblyklik ‘n liedjie oor
Julius Malema geskryf waarin hulle hom as “onbeheerbaar” beskryf.
In die liedjie kritiseer hulle ook die
ANC-leierskap.
Die enkelsnit, getiteld uMalema, is na
radiostasies gestuur en sou vanaf Donderdag uitgesaai word.
Die ANC-jeugliga se sekretaris, Sindiso
Magaqa, het gesê hulle sal ‘n hofbevel kry om die uitsending te stop.
Hulle is ook van plan om die groep hof toe te
sleep vir naamskending indien hulle daarop aandring om die liedjie te sing.
Dieselfde groep het in 2007 'n liedjie oor Jacob Zuma geskryf, voordat hy president geword het.
In dié liedjie, getiteld "Msholozi", het hulle egter die ANC-leier se lof besing en gesê dat aanklagte van korrupsie teen hom laat vaar moet word.
Volg Nuus24 op Twitter.
- SAPA