ANC-jeugliga sien rooi oor Malema-lied

2011-11-04 13:10

Durban – Die ANC-jeugliga het onderneem om die vrystelling van ‘n lied wat Julius Malema se gedrag bevraagteken, te verhoed.

“As hulle daardie simpel lied vrystel sal ons hulle hard tref,” het die jeugliga se algemene sekretaris, Sindiso Magaqa, gesê.

Izingane Zoma, ‘n maskandi-musiekgroep, het ‘n enkelsnit genaamd “uMalema” aan radiostasies vrygestel en dit sal na verwagting volgende week ook te koop wees.

The Mercury het berig dat die lied Malema daarvan beskuldig dat hy die ANC se leierskap kritiseer en dat hy buite beheer is.

Dieselfde groep het ‘n enkelsnit oor president Zuma vrygestel voordat hy in 2007 as president van die ANC verkies is. Dié lied se titel was “Msholozi”, Zuma se stamnaam, en het gevra dat hy as president gekies moet word en dat die korrupsie-aanklagte teen hom laat vaar moet word.

Magaqa het gesê sy organisasie sal nie toelaat dat die groep hul leier beledig nie.

“Ons sal hulle nie toelaat om dit te doen nie. Ons weet hulle het dit voorheen gedoen en hulle was suksesvol, maar hulle sal nie hierdie keer wen nie,” het hy gesê.

Hy het bygevoeg dat die jeugliga hof toe sal gaan om die vrystelling van die lied te keer, en dat hulle die groep vir naamskending sal dagvaar.

Izintombi Zoma se vervaardiger, Busani Khuzwayo, was nie onmiddellik vir kommentaar beskikbaar nie.

– Volg Nuus24 op Twitter

 

- SAPA