ANC in Wes-Kaap steun Mediaplan
2010-09-13 06:45
Bredasdorp - Die Wes-Kaapse ANC het die naweek sy steun aan die voorgestelde mediatribunaal toegesê, want “die media word gedryf deur mediatrepeneurs en wetteloosheid”.
Dít was van die besprekings tydens die ANC se provinsiale hoofraadsvergadering, wat gehou is om op provinsiale vlak die waters te toets vir die komende nasionale hoofraadsvergadering einde vandeesmaand.
Op dié vergadering sal die vordering met die implementering van die Polokwane-resolusies geëvalueer word.
Afgevaardigdes het tydens die terugvoersessie gesê die media is nie neutraal nie en weerspieël ideologiese gevegte op grond van klas en ras.
Daar is ook gesê selfregulering werk nie. Die media is ook daarvan beskuldig dat hy feite verdraai en sensasioneel is en glad nie die Suid-Afrikaanse nasionale agenda help dryf nie.
Daar is onder meer aanbeveel dat naas die tribunaal ook ’n mediahandves opgestel word wat die transformasie van media-eienaarskap moet dryf.
Vordering met ekonomiese transformasie in die land het talle van die afgevaardigdes later warm onder die kraag gehad.
“Die punte oor ekonomiese transformasie maak ons nie opgewonde van blydskap nie,” het Maxwell Moss, ’n ANC-afgevaardigde, gesê.
“Dit is nie spesifiek genoeg nie. Ons moet ’n oorsig doen van ekonomiese ontwikkeling sedert 1994 en spesifiek wie wat gekry het,” het hy gesê.
Moss moes terugvoer gee oor die uitkoms van besprekings in die wegbreeksessies hieroor.
Hy het gesê die besprekingsdokument “is te sag en neig te veel na kapitalisme”.
“Daar is geen radikale alternatiewe in die dokumente oor veral die hersiening van monetêre en fiskale beleid nie.”
Moss het ook gesê die dokument se fokus is nie plaaslik genoeg nie en daar moet ook meer op vroue en gestremdes gefokus word.
Toe die kwessie van nasionalisering, veral van myne, geopper is, het van die ANC-afgevaardigdes om die teetafel onderlangs gesê: “Vat dit, ja, dit is ons s’n.”
Een van die afgevaardigdes het tydens Moss se terugvoering gesê daar is meer as R6miljard se minerale onder die grond wat vir die nasionale transformasie-agenda aangewend kan word.
“Belastinginkomste is nie genoeg vir die regering om armoede aan te spreek nie,” het die afgevaardigdes gehoor. “Ons moet eis wat aan ons behoort.”
Membathisi Mdladlana, die Wes-Kaapse sameroeper van die ANC-taakspan, moes die afgevaardigdes paai toe emosies begin hoog loop en dié debat gedreig het om die terugvoersessie te oordonder.
“Ons is hier om besluite wat reeds geneem is te assesseer en nie nuwes te maak nie,” het hy hulle herinner.
- Die Burger