ANC in Limpopo, Wes-Kaap kies weer

2012-12-05 07:12

Johannesburg – Die ANC in Limpopo en die Wes-Kaap sal Woensdag 'n tweede kans gegun word om hulle benoemingskonferensies te hou.

Beide provinsies se konferensies is Vrydag afgelas toe dit ontwrig is en deur logistieke probleme in die wiele gery is.

ANC-lede in Limpopo moes Vrydagaand hulle konferensie tot 'n einde bring toe dit deur 'n groep "gewelddadige boewe" ontwrig is. Die groep het T-hemde met pres. Jacob Zuma se gesig op aangehad.

Afgevaardigdes moes die gebou naderhand ontruim.

Die ANC in die Wes-Kaap het Saterdagoggend ook sy byeenkoms afgelas sonder om kandidate te benoem weens vertragings as gevolg van logistieke probleme. Die verifiëring van afgevaardigdes het veral probleme veroorsaak.

Die afgevaardigdes het Saterdagaand weer byeengekom, maar die konferensie is weer afgelas.

Die ANC se nasionale uitvoerende komitee het Maandag besluit om die twee provinsies weer 'n geleentheid te gee om hulle kandidate vir die ANC-leierskap te benoem vir die Magaung-verkiesingskongres later in die maand.

– Volg Nuus24 op Twitter.

- SAPA