ANC in Kaapstad verdeeld oor Zuma

2012-11-21 09:22

Kaapstad – Die ANC se Dullah Omar-streek in die Wes-Kaap is verdeeld oor of Zuma die party se president moet bly, berig die Cape Times.

Faizel Moosa, adjunkvoorsitter, en Vuyiso Tyhalisisu, sekretaris, is glo haaks oor of hulle Zuma of adj.pres. Kgalema Motlanthe moet steun vir die party se verkiesingskonferensie in Mangaung.

Die streek dek Kaapstad en is die grootste in die provinsie.

Tyhalisisu het aan die ANC-jeugliga se spesiale algemene raad gesê: "Die streekleierskap is duidelik – verandering is onafwendbaar".

Hy het tydens die vergadering gesê diegene wat die huidige leierskap van die ANC wil behou, stel slegs belang daarin om die openbare beursie te stroop.

"Ons gaan ons waardigheid verloor. Ons gaan in politieke prostitute verander word."

Moosa het gesê die sekretaris het geen mandaat om te sê dat die streek Motlanthe steun nie.

     
– Volg Nuus24 op Twitter

- SAPA