ANC hof toe oor skole wat sluit
2012-10-17 08:55
Kaapstad – Die ANC in die Wes-Kaap het gesê hy beplan om die provinsiale departement van onderwys hof toe te sleep weens die sluiting van 20 skole, het die Cape Argus Woensdag berig.
"Ons sal hierdie na die hoogste vlak neem. Geen hof in Suid-Afrika kan sê dat ons nie 'n saak het nie. Wees verseker dat hierdie nie 'n leë dreigement is nie," het Marius Fransman, die ANC se provinsiale leier, aan die koerant gesê.
Hy het bygevoeg dat die saak veel verder as blote partypolitiek strek.
Donald Grant, LUR vir onderwys, het Dinsdag die sluitings aangekondig, en gesê dat sewe skole wat aanvanklik gesluit sou word, se deure oop sal bly.
'n Leerder by die Zonnebloem Nest-skool het aan die koerant gesê dat sy verlig is haar skool word nie gesluit nie.
"Hierdie is die enigste skool wat my ouers kan bekostig wat drama en Spaanse klasse aanbied," het sy gesê.
Leerders by die Beauvallon-skool het egter briewe ontvang wat hulle in kennis stel dat hulle skool sal sluit.
Henry Hockey, dié skool se hoof, het gesê die verskuiwing van sy leerders van Valhalla Park na Bishop Lavis sal 'n bende-oorlog ontketen wat die kinders negatief sal raak.
– Volg Nuus24 op Twitter.
- SAPA
