ANC-hoës kan spit afbyt oor ‘skandaal’
2011-08-04 07:06
Kaapstad – Die koppe kan begin rol ná ’n uitgebreide interne forensiese ondersoek na die ANC se “bruinkoevert-skandaal” tydens die party se bewind in die Wes-Kaap.
Benewens bekende politici kan verskeie hooggeplaaste amptenare in die wetgewer die spit afbyt.
In ’n beëdigde verklaring, wat in besit van Media24 se ondersoekspan is, sê adv. Brent Gerber, direkteur-generaal van die provinsie, daar bestaan ’n “redelike vermoede” dat verskeie mense aan een of meer oortredings skuldig kan wees. Die verklaring is reeds aan die polisie oor- handig.
Onder die bekendes wat Gerber noem as betrokkenes by ’n uitgebreide netwerk van beweerde korrupsie en wanbesteding is Ebrahim Rasool, gewese Wes-Kaapse premier, en Marius Fransman en Leonard Ramatlakane, gewese provinsiale ministers.
Die verklaring is afgelê ná ’n ondersoek deur ’n span interne en eksterne forensiese kundiges. Bedrae van tussen R50 miljoen en R200 miljoen wat aan konsultante en reklamemaatskappye bestee is, is vroeër genoem.
Gerber noem dat hy uit ’n beëdigde verklaring van Ashley Smith (voormalige Argus-joernalis), wat erken het dat hy omkoopgeld ontvang het, aflei dat sekere mense “saamgesweer en -gewerk het met Rasool, Fransman en Ramatlakane”.
Ingevolge die Wet op die Voorkoming en die Bekamping van Korrupte Aktiwiteite is dit onwettig.
Ramatlakane het gister gesê hy weet niks van die ondersoeke nie, terwyl Rasool en Fransman nie op navrae gereageer het nie.
– Volg Nuus24 op Twitter.
- Die Burger