ANC erken ‘erosie’ en ‘twyfelagtige leierskap’
2010-07-30 06:55
Kaapstad - Die regerende party erken en sien die erosie van sy kultuur van verantwoordbaarheid, diensbaarheid en morele leierskap.
Nóg meer beduidend, lui die ANC se besprekingsdokument oor leierskap, is die groeiende “maatskaplike afstand” tussen dié in posisies van mag en dié op grondvlak.
Die party is diep bekommerd oor “skadukulture” wat soos “parasiete” op simboliek en geskiedenis teer en die ANC en regering vir eie gewin misbruik.
Ondanks waarskuwings voor en ná die party se nasionale konferensie in 2007 by Polokwane, het sommige neigings nie net meer wydsverspreid geword nie, maar gevestig geraak in partykultuur.
Só word geld en invloed gebruik om die oorhand in gebiedsoorloë en faksiegevegte op alle vlakke van die party te kry. Dit lei dikwels daartoe dat ANC-saamtrekke of -vergaderings in geweld of oproer ontaard. Lede is gevolglik toenemend besig om vertroue in die party se interne strukture te verloor.
Die party betreur ook die aanhoudende geskarrel om leiersposisies: “Dit het tot gevolg dat opvolgdebatte en struwelinge begin nog voordat ’n nuutverkose leierskorps die kans gekry het om hul mandaat uit te voer.”
Die lei ook tot ’n kultuur waarin “die wenner alles vat” in leiersverkiesings op alle vlakke is daar minder en minder middelgrond tussen opponerende groepe, wat tot tweespalt lei.
“Twyfelagtige leierskap” in die ANC lei na swak dissipline en straffeloosheid. “Die ANC-leierskollektief word dikwels verlam weens vrese van optrede teen ‘ons groep’ of optrede teen die ‘ander groep’, wat as ’n suiwering vertolk kan word,” lui die besprekingsdokument.
Dié faksieverdelings word ook gekenmerk deur die kaap van ANC-simbole deur een groep en die sing van beledigende struggle-liedjies teen die opponerende groep.
Dis verder kommerwekkend dat álmal hierby betrokke is: “Beide ‘ou’ en ‘nuwe’ lede en leiers op alle vlakke is betrokke met al hoe minder stemme in ons midde om leiding te gee.”
- Die Burger