ANC en Vavi weer haaks
2010-11-03 06:28
Die Burger
Kaapstad - ’n Woedende ANC het Cosatu gewaarsku teen enige planne deur vakbondleiers en die burgerlike samelewing om ’n opposisieparty te stig.
Dít volg op Cosatu se burgerlike beraad verlede week wat vir die ANC lyk na pogings om vir ’n regeringsverandering voorbrand te maak.
Die vakverbond het egter teruggekap, die aantygings verwerp en gesê hy gaan nie aan ’n oor-en-weer-slegsêery deelneem nie.
“Ons gaan nie op insinuasies of die bevraagtekening van Cosatu se geloofwaardigheid of dié van sy leiers, wat duidelik in ’n smeerveldtog geteiken word, reageer nie. Ons reageer op grond van beginsels.”
Gwede Mantashe, die ANC se sekretaris-generaal, het Dinsdag in ’n sterk bewoorde verklaring van die party se nasionale werkkomitee (NWK) gesê Cosatu moet daarteen waak om die indruk te wek dat hy besig is om ’n werkersparty op die been te bring.
Die vakbondfederasie moet – met oënskynlike verwysing na die MDC in Zimbabwe – “uit die geskiedenis van lande elders op die kontinent leer waar arbeidsleiers met burgerlikes saamgewerk het om alternatiewe politieke partye op die been te bring ten einde die regering te ontsetel”.
Die NWK-verklaring volg op toenemende irritasie in die regerende party oor Vavi en Cosatu se uitgesproke kritiek op regeringsbeleid, toenemende korrupsie in die regering en die vertoning van rykdom deur ANC-kaders.
Hoewel daar vroeër vanjaar sprake van tugstappe teen Vavi was (hy is ook ’n ANC-lid) het die NWK dit volgens Mantashe nie op sy vergadering eergister oorweeg nie.
Mantashe het in die verklaring gesê hy glo nie die meerderheid van Cosatu-leiers wil ’n “regime-verandering” sien nie, maar waarsku dat pogings om ’n breë burgerlike beweging buite die regerende alliansie se strukture te stig “inderdaad vertolk kan word as voorlopige stappe om ’n regime-verandering in Suid-Afrika te bewerkstellig”.
’n Vakbondleier na aan Vavi het gesê Cosatu gaan nie afsien van sy strategie om in die openbaar kritiek te lewer of nou met burgerlike organisasies saam te werk nie.
“Ons het besluit dit is die enigste manier om die ANC onder druk te plaas sodat hy doen wat hy belowe. Dis al hoe Cosatu sy punt kan maak en dit lyk of dit werk. Die ANC is besig om te oorreageer.”
Cosatu het gesê die beraad was nié anti-ANC of -regering nie en organiseerders het uit hul pad gegaan om die saamtrek se doelwitte te verduidelik asook waarom politieke partye nie genooi is nie.
Cosatu is toegewyd tot die alliansie, maar het nie nodig om toestemming te vra wanneer hy in gesprek met ander organisasies wil tree nie.
- Die Burger