ANC-eeufees: Ekstra 3 000 polisiebeamptes ingespan
2012-01-06 10:30
Bloemfontein – Meer as 3 000 polisiebeamptes van oor die land heen is in Bloemfontein saamgetrek om veiligheid met die ANC se eeufeesviering te verseker.
Nie net die lugruim en paaie word dopgehou nie, maar daar word ook “ondergronds” gewerk om te verseker daar is geen probleme nie, het lt.genl. Nhlanhla Mkhwanazi, waarnemende polisiehoof, Donderdag in Bloemfontein gesê.
Mkhwanazi het gesê intelligensiedienste is ook oor die land heen aan diens om seker te maak daar is geen bedreigings vir die eeufees in Mangaung nie.
Die laaste ding wat moet gebeur, is ’n vliegtuig wat teen die Vrystaat-stadion vasvlieg, sê Mkhwanazi.
“Enigiemand wat ’n komplot beplan, sal vasgevat word.
“Ons gaan weet wat mense beplan en dit gaan nie werk nie.”
Hy het sy beamptes gevra om hard en gedissiplineerd te werk om die meer as 50 staatshoofde, die ander besoekers en inwoners van Bloemfontein behoorlik te beveilig.
“Ons gaan 24 uur per dag werk. Moet nie drink en dronk wees aan diens nie.
“Julle is 24 uur aan diens en kan enige tyd opgeroep word.”
Hy het ook gesê polisiebeamptes mag geensins by politiek betrokke raak ten tyde van die viering nie.
Sommige strate, veral rondom die stadion sal gesluit en deur polisie -en verkeersbeamptes beman word.
Bastion- en Mantlestraat in Waaihoek en Phale-, Mogami -en Sedikelstraat rondom die buitemuurse sportkompleks in Mangaung sal ook gesluit wees.
Volg Nuus24 op Twitter
- Volksblad