ANC bevestig besoek aan China
2011-10-10 19:33
Johannesburg – Die ANC het bevestig dat die party se sekretaris-generaal, Gwede Mantashe, ‘n afvaardiging sal lei na China om bande met die Chinese Kommunistiese Party te versterk.
“Die doel van die besoek is om bande tussen die partye te versterk,” het Keith Khoza, ANC-woordvoerder, Maandag gesê.
“Die ANC het bande met alle progressiewe partye oor die wêreld heen. Ons deel ervaringe, uitgangspunte en perspektiewe op kwessies van internasionale regering.”
Volgens Khoza is die regering veral daarin geïnteresseerd om by die politieke partye wat lande in die sogenaamde Brics-lande (Brasilië, Rusland, Indië, China en Suid-Afrika) regeer, te leer.
Khoza het bevestig dat verskeie ANC-besoeke aan China reeds plaasgevind het om beamptes toe te laat om met hul Chinese eweknieë saam te werk voor die opkomende besoek.
Khoza het ontken dat die besoek enige rol gespeel het in die regering se hantering van die Dalai Lama se visumaansoek. Die Tibettaanse geestelike leier wou na Suid-Afrika reis om Emeritus-Aartsbiskop Desmond Tutu se 80ste verjaardagvieringe by te woon.
“Nee, nee, die besoek is lank voor dit beplan,” het hy gesê.
- Volg Nuus24 op Twitter
- SAPA