ANC bekommerd oor polisiebrutaliteit
2011-04-28 14:57
Johannesburg – Die ANC is bekommerd oor polisiebrutaliteit in Suid-Afrika, het pres. Jacob Zuma Donderdag gesê.
Zuma het na die moord op die Ficksburg-betoger Andries Tatane en Jeanette Odendaal in Kemptonpark verwys toe hy verslaggewers by Luthuli-huis in Johannesburg toegespreek het. Beide Tatane en Odendaal is na bewering deur polisielede doodgemaak.
“... Ons wil nie hê dat mense gewelddadig teenoor betogers moet optree nie. Ons veroordeel dit ten volle,” het Zuma gesê.
“Tatane het net betoog toe hulle hom doodgeslaan het. Dit is sy reg om protes te lewer. Dit is onaanvaarbaar...”
Zuma het vertroue dat beide moorde nie die ANC se verkiesingsveldtog sal affekteer nie.
“Dit het nie die verkiesing geaffekteer nie, want ons mense weet wat die ANC se uitkyk op dié sake is,” het hy gesê.
Die party sal daarop fokus om demokrasie te “vervolmaak en verryk.”
‘n Video van Tatane se dood is onlangs op nasionale televisie uitgesaai. Altesaam agt polisiebeamptes het Dinsdag in ‘n hof in Ficksburg, Vrystaat, verskyn in verband met die moord op 13 April.
Odendaal (45) is doodgeskiet nadat sy teen ‘n polisievoertuig gebots het. Sy is na bewering deur ‘n polisiesersant doodgeskiet.
Die voorval het Dinsdagaand gebeur toe sy glo haar motor buite die polisiestasie in Kemptonpark probeer parkeer het.
Die offisier sal na verwagting Vrydag in die landdroshof in Kemptonpark verskyn.
Twee ander sake van polisiebrutaliteit is Dinsdag in KwaZulu-Natalse howe aangehoor.
Vyf polisiemans het na bewering ‘n aangehoudene in Greytown verwurg. In Hammarsdale word 15 polisiemans daarvan beskuldig dat hulle ‘n verdagte doodgeslaan het.
Volg Nuus24 op Twitter.
- SAPA