ANC-bande is nie sy lokaas, sê sakeman
2010-06-13 10:30
Rapport
Kaapstad - ’n Sakeman met bande met hoë ANC-politici én sakebelange oor die hele Afrika is in ’n bitter vete gewikkel oor beweerde bedrog wat nou in die hof kan draai.
Jeff Franciscus, wat die plaas Klein Nederburg in die Paarl besit en bekend is om sy spoggerige Mercedes-Benz-sportmotors, sê egter dié bewerings teen hom is “bloot ’n saketransaksie wat verkeerd geloop het”.
’n Sakevrou wat anoniem wil bly, het Rapport ingelig sy kan nie haar R155 000, wat ’n deposito moes wees vir ’n saketransaksie tussen hulle, uit Franciscus kry nie.
Franciscus het volgens die bron sy bande met swaargewig-politici soos pres. Jacob Zuma en Trevor Manuel en Marius Fransman, sowel as Manuel se vrou, Maria Ramos, grootbaas van Absa, gebruik om sake met haar te doen.
Dirk Kotze, die bron se prokureur van die firma Van der Meer-prokureurs, sê talle ander maatskappye, wat glo saam R1 miljoen as deposito’s aan Franciscus betaal het, beplan nou regstappe.
“Ons het reeds ’n klag van bedrog by die Kuilsrivier-polisiekantoor (wat dit aan Rapport bevestig het) ingedien en sal binnekort ’n likwidasie-aansoek teen sy maatskappy, Proximitas Investments 123, indien.”
Die bron beweer Chris Nissen, nog ’n ANC-grootkop, het gesê sy moet die bedrogklag indien.
Fransman ontken hy het die bron aan Franciscus voorgestel.
“Hul private saketransaksies het niks met my te doen nie. Ek ken Franciscus nie lank nie, maar hy is nêrens in die ANC nie. Mense moet nie politici se name rondgooi nie.”
Volgens Rapport se bron is sy in Maart vanjaar op sy plaas aan Franciscus voorgestel.
“Ons was beïndruk deur sy plaas en Mercedes-Benz-sportmotors van oor die R1 miljoen elk. Ons wou sowat R2,5 miljoen leen om nuwe masjinerie vir ons ingenieursfirma aan te koop.”
Maar Franciscus het onder meer genoem dat hy:
- binne sewe dae internasionale befondsing kan reël,
- goeie vriende met Zuma is en die bron briewe gewys dat hy R8 miljoen tot Zuma se hofsaak bygedra het (hy ontken dit óf dat hy Zuma persoonlik ken); en
- Manuel en Ramos sy vriende is.
Volgens die bron sou sy drasties minder rente betaal op Franciscus se lening as aan die bank en sy het ’n deposito van R155 000 aan hom betaal. Hulle het dit gekanselleer omdat niks gebeur het nie.
Franciscus was gister in sy prokureur, Martin Green, se teenwoordigheid, onbewus van regstappe teen hom.
“Dit is ’n eenvoudige saketransaksie wat gekom het ná ’n liefdadigheidsgeleentheid vir Haïti op my plaas.
“Hulle het ons per SMS ingelig dat hulle dit wil kanselleer en ons het geweier totdat hulle dit per brief doen. Hulle het ’n lasterlike SMS-vete teen my begin, só erg dat ons prokureurs hulle al gewaarsku het om op te hou daarmee.”
Hy ontken hy het die genoemde politici se name aan die mense genoem.
“Hulle was onder ’n wanindruk dat, omdat ek daagliks met politici omgaan, hul besigheid onbehoorlik daardeur bevorder sal word.
“Ek sal egter nie hieroor my bande met ANC-politici verbreek nie en oor my karre, so what? Ek kan ’n Porsche ry en dan het dit steeds niks met hulle te doen nie. Hulle moet hul bewerings kan bewys.”
Volg Nuus24 op Twitter
- Rapport