ANC-beampte buite huis doodgeskiet

2012-12-14 08:31

Johannesburg – 'n Beampte van die ANC in die Noordwes is Vrydagoggend buite sy huis in Klerksdorp doodgeskiet, het die polisie gesê.

"Niemand anders is in die skietery beseer nie... 'n Saak van moord is geopen," het brig. Thulani Ngubane gesê.

Die polisie is steeds op die toneel.

Thandi Modise, premier van die Noordwes, het die slagoffer geïdentifiseer as Obuti Chika, die party se streeksekretaris.

"Die polisie moet geen steen onaangeroerd laat tot diegene wat verantwoordelik is, aangekeer is nie," het sy gesê.

Modise het gesê verskeie beamptes in die provinsie is in die laaste paar weke deur geweldsmisdaad geteiken.

"Die provinsiale regering wil weet wie agter hierdie sluipmoorde is," het sy gesê.

– Volg Nuus24 op Twitter.

- SAPA