Finale weergawe van inligtingswet aanvaar
2012-11-27 11:31
Johannesburg – Die ANC het die finale weergawe van die omstrede Wetsontwerp op die Beskerming van Staatsinligting aanvaar.
Sapa berig die regerende party het die dokument in die afwesigheid van opposisiepartye aanvaar, nadat dié partye op ‘n bespreking van die omstrede muilbandwet uitgeloop het.
“Dit is afgehandel. Ons is baie gelukkig dat ons so ver gevorder het,” het Sam Mazosiwe, ANC-wetgewer, gesê.
Die DA en Cope het geweier om oor 'n dokument wat die veranderings aan die wetsontwerp uiteensit, te stem, aangesien dit eers ná die vergadering begin het, aan hulle uitgedeel is.
Beeld berig Alf Lees, DA-LP, het gesê die parlementslede sou die verslag Maandag om 14:00 al ontvang het.
“Dit is egter eers hier aan die begin van die vergadering uitgedeel. Hoe kan ons so verslag aanvaar wat ons nog nie gesien het nie?”
“Hoe kan ons ‘n verslag wat oor die hele jaar sou handel eers in die komitee ontvang?” het Dennis Bloem van Cope gesê.
Raseriti Tau, ANC-LP en komiteevoorsitter, sê die saak sal op 29 November voor die Nasionale Raad van Provinsies dien.
Volg Nuus24 op Twitter
