ANC-LP's meen OB verdien te veel geld
2012-02-12 10:11
Kaapstad – ANC-LP’s meen adv. Thuli Madonsela, die openbare beskermer (OB), word te veel betaal.
Madonsela se jaarlikse salaris van R1,789 miljoen is gelykstaande aan dié van ’n appèlhofregter en ’n premier, maar is steeds aansienlik minder as wat die speaker van die parlement, Max Sisulu, en ministers jaarliks in hul sak steek.
Madonsela het Woensdag voor die portefeuljekomitee oor justisie verskyn om ’n hoër salaris vir haar adjunk – adv. Mamiki Shai – te beding, maar moes bontstaan toe ANC-LP’s háár hoë salarispakket skielik bevraagteken het.
Ingevolge wetgewing mag die OB nie minder as ’n regter van die hooggeregshof verdien nie (R1,454 miljoen). Al mag Madonsela se pakket nie midde-in haar termyn van sewe jaar verander nie, oorweeg ANC-LP’s ’n wysiging van die Wet op die Openbare Beskermer om by voorbaat ’n beperking op haar opvolger se salaris te plaas.
Luwellyn Landers, ANC-LP en komiteevoorsitter, het gesê Madonsela moet die kwessie “nie persoonlik opneem nie”. “Die OB verdien nou dieselfde salaris as dié van ’n appèlhofregter. Was dít die bedoeling van die wetgewing? Ek dink nie so nie,” het hy gesê.
Madonsela het vroeër aangevoer haar verpligtinge en dié van haar adjunk is meer “tydrowend” as dié van regters. “Ons hou ook verhore, doen ondersoeke én skryf verslae wat net so belangrik (soos regters se uitsprake) is en dieselfde vaardighede verg. Ons doen eintlik meer skryfwerk as regters en dit is van dieselfde gehalte.”
John Jeffery, ANC-LP, het Madonsela ingevlieg en aangevoer sy durf nie haar kantoor met dié van die howe vergelyk nie.
“My kommer is die OB dink soms sy is ’n artikel 8-instelling (hof), maar sy is nié. Sy is nie ’n regter nie en lewer nie uitsprake nie.”
Die eintlike doelwit van Madonsela se besoek was om die portefeuljekomitee te vra om haar adjunk se huidige jaarlikse salaris van R1,2 miljoen tot R1,45 miljoen te verhoog. Sy het gepleit dit moet terugwerkend tot Mei 2010 wees.
Nie een van die LP’s was egter daarvoor te vinde nie omdat Shai toe sy in Desember 2005 aangestel is, geweet het wat haar jaarlikse salaris is en dit onvoorwaardelik aanvaar het.
Jaarlikse salarispakkette:
* Pres. Jacob Zuma: R2,485 miljoen
* Adj.pres. Kgalema Motlanthe: R2,237 miljoen
* Mnr. Max Sisulu, speaker: R2,237 miljoen
* Hoofregter Mogoeng Mogoeng: R2,237 miljoen
* Ministers: R1,9 miljoen
* Premiers: R1,789 miljoen
* Adv. Thuli Madonsela, openbare beskermer (OB): R1,789 miljoen
* Adv. Lawrence Mushwana, in 2009 toe sy termyn as OB verstryk het: R1,5 miloen
Volg Nuus24 op Twitter
- Rapport
